就嚟到放榜日，好多同學可能都好緊張，唔知當日有咩一定要做。唔駛緊張㗎，不論成績點，最緊要係有應對計劃。我哋而家嚟預習一下你將會經過嘅 steps啦！
首先，你需要按時返學校拎成績通知書，所有接下嚟自己一個面對嘅步驟，都係由呢度開始。你嘅同學可能會想慶祝，或者合照，畢竟都係一次re U。但係如果你成績未如理想，唔想參與慶祝，都唔緊要㗎，只要完哂學校嘅官方流程，你就可以靜靜離去。不過有啲學校會安排升學組嘅老師留低幫同學考慮點樣改選同叩門，如果你覺得有需要老師嘅協助，可以揾老師，但如前文所述，升學組嘅老師嘅意見未必貼合最新情況，聽師兄姐講可能仲有用。
如果成績夠入心水嘅科，可以睇下夠唔夠入心儀科目。呢個時候都要按返往年收生分數判斷你係咪能夠入讀到 Band A ~ C 嘅科目，如果唔得，就要將呢啲科放入 Band D E 。詳細排法請見另文。
成績唔太理想都唔緊要，拎到成績就去有興趣嘅專上學院登記。可能要等2至3個鐘，所以一日最多只係去到3個招生會。呢啲學額都係先到先得嘅，所以放榜前最好作好計劃，按咩順序去叩門。如果要去叩門，你可能要準備以下呢啲嘢。當然，你拎成績表之前都唔會知你要唔要叩門，所以為免又要特登返屋企拎，一出一入嘥時間，最好返學前就帶哂先。
- 身份證
- 證件相
- DSE 成績表
- 學生學習概覽SLP
- OEA 列表或履歷表
- 現金
- 文具
- 八達通
- 學校推薦信 （如有）
- 有條件取錄通知 （如有）
- 尿袋
- 乾糧同水
- 雨傘
無論你嘅成績是否理想，只要你唔係全科 5** ，都會建議你 appeal ，因為總有升 grade 嘅可能性，要避免唔做後悔。而且 appeal 升到 grade JUPAS 有機會可以超過學額都入到更理想嘅科。最多可以覆核四科。覆核分為積分覆核同重睇答卷兩種，可以試下。當然要考慮經濟能力，所以另文都有提及要提早儲錢。順帶一提，即使屋企人話嘥錢，都唔好聽，用自己錢 appeal ，可能性由自己買。因為我就係聽咗屋企人講貴就放棄咗而後悔果個。