相信唔少人讀地理都會都會遇到啲困難，有時覺得已經溫曬書但係考試時都係一頭霧水。
當年F3因為我想讀嘅科唔夠人開唔到班，所以先讀地理。所以我F4-F6一直都係hea讀，學校預我得2，我直到臨考DSE先開始認真自學+補習，最後喺一個月內升左三個level，攞到個五。所以其實地理係可以喺短時間內升level嘅科黎，因為DSE地理比起考學生嘅知識儲備，有好大一部分係考緊答題技巧。
我會分四個部分黎講。
1.課題選擇
2.MC
3.DBQ
4.Essay
首先講下課題選擇，地理科要讀嘅分別係係自然地理（C1,C2,E1,E2)，人文地理（C3,C4,E3)同埋綜合（C5,C6,C7,E4)。考試一定係首選自然地理同綜合，題型嘅變化比較少，同埋考嘅內容比較固定，非常容易攞分。
我強烈建議讀E2天氣與氣候，好多學校因為E2比較多野教而選擇教E1/E4，雖然讀E2相對多野記，但係有個好處，就係考試題型變化少，同埋同C5-C7有關聯，讀E2可以幫了解多啲氣候形成嘅原理，令你答題嘅時候可以融會貫通啲知識。加上其實E2有部分嘅野我覺得係common sense，例如颱風點形成，所以又係容易攞分。
至於人文地理溫MC就夠，佢嘅題型相對變化較大，同埋需要較多嘅時事嘅例子，好容易答唔中失分，亦唔容易攞高分。
個人而言
DBQ嘅課題選擇：C7=C1>C6=C5=>C3>C2=C4
Essay嘅課題選擇：C5=C6=C7>C1>C3>C2=C4
（C2因為我時間唔夠溫得唔深入，唔係嘅話可以較優先選擇）
MC基本上20分鐘要做曬，一定要做曬以前嘅past paper，最好就by topic咁操，同埋要認真睇題目，考評局出好多題目都好tricky，好容易心急答錯失分。地圖閱讀係攞分題，一定要熟點樣睇地圖證據，計坡度之類嘅技巧。
DBQ一定要熟題型，我有唔少學生補習前根本唔知評估題係要講曬好處壞處，有時學校未必教或者會簡單略過，咁就失左好多分，所以一定要操完past paper對marking scheme，可以幫到你熟悉答題方向，要熟到之後考試見到題目就即刻知道要答咩point，咁樣就算考試見到新嘅題型，你都可以大概預測到考評局想你答嘅內容。
Essay一定要小心睇題目，有時有啲Essay題目範圍會出得窄啲，我用2020做例子，C1嘅題目問土地利用規劃，C7嘅題目係問科技，好明顯C7嘅答題範圍比較大，C1除非你有具體嘅土地利用規劃嘅例子，唔係嘅話好容易寫唔中point，所以要識揀題目。
地理科熟題型，熟答題技巧就可以事半功倍，所以只要keep住溫past paper就已經可以秒殺DSE啲題目。
Non-JUPAS.info 提供中文卷地理科補習服務，1班1-2人 ( 請自組 ) 每班 $750/2小時，有意試堂請聯絡 寫文巴 代為通知導師。